ప్రధాని నరేంద్ర మోదీ ఆస్ట్రేలియా పర్యటన సందర్భంగా భారత్–ఆస్ట్రేలియా ద్వైపాక్షిక సంబంధాలు మరింత బలపడ్డాయి. ఈ పర్యటనలో ఇరు దేశాలు మొత్తం 18 కీలక అంశాలపై సహకార ఒప్పందాలు కుదుర్చుకున్నాయి. వాణిజ్యం, రక్షణ, విద్య, సాంకేతికత, పెట్టుబడులు తదితర రంగాల్లో భాగస్వామ్యాన్ని మరింత విస్తరించనున్నట్లు ఇరు దేశాల ప్రధానులు వెల్లడించారు.

మెల్‌బోర్న్‌లో నిర్వహించిన కార్యక్రమంలో ప్రసంగించిన ప్రధాని మోదీ ఆస్ట్రేలియాలో నివసిస్తున్న భారతీయుల సేవలను కొనియాడారు. "చక్కెర కలిస్తే పాలు మరింత తీయగా మారినట్లే, భారతీయులు ఆస్ట్రేలియా సమాజంలో కలిసిపోయి దాని అభివృద్ధిలో భాగస్వాములయ్యారు" అని అన్నారు.

అలాగే, "ఆస్ట్రేలియాలోని భారతీయుల ఇళ్లలో పాలు ఆస్ట్రేలియాకు చెందినవైనా, టీ మాత్రం భారత్‌దే" అంటూ చమత్కరించగా సభలో నవ్వులు పూశాయి.

ఈ సందర్భంగా ఇరు దేశాల స్నేహబంధంపై కూడా ప్రధాని మోదీ ఆసక్తికర వ్యాఖ్యలు చేశారు. ఆస్ట్రేలియా ప్రధాని "ఒకటికి ఒకటి కలిపితే రెండు అవుతాయి.. అలాగే మన రెండు దేశాలు కలిసి మరింత బలంగా ముందుకు సాగుతాయి" అని పేర్కొనగా, దానికి స్పందించిన ప్రధాని మోదీ "భారత్‌లో ఒకటికి ఒకటి కలిపితే 11 అవుతుంది" అంటూ హిందీలో చమత్కరించారు. కలిసి పనిచేస్తే శక్తి మరింత పెరుగుతుందనే సందేశాన్ని ఆయన ఈ వ్యాఖ్యల ద్వారా తెలియజేశారు.